اللى فى الصورة دى صخرة معفنة كدة ملهاش اى ملامح عاملة زى الزلطة موجودة فى اقصى شمال الكوكب ناحية القطب الشمالى مساحتها 1.3 كم مربع فقط لاغير (اللى هى كيلو فى كيلو تقريبا)!!, يعنى حاجة كدة زى فسفوسة طالعة فى فخدة ديناصور اسمها جزيرة هانز .. الصخرة دى ملهاش اى اهمية جغرافية و لا اقتصادية و لا سياسية و لا استراتيجية و لا تاريخية و لا ادبية و لا علمية و لا جنسية و محدش مستفيد منها ببصلة و لو العالم صحى الصبح لقاها اختفت هيتاوب و يكمل نوم عادى..
الصخرة دى واقعة فى نص المسافة بالظبط بين الدنمارك و كندا .. و البلدين طاحنين بعض بسببها من تلاتينات القرن الماضى لحد انهاردة مع انهم عارفين ان اكيد صخرة زى دى فى وسط الجليد ملهاش اى لازمة .. بس كل شوية بلد تبعت قوات للصخرة ترفع علمها عليها و تمشى, فالبلد التانية تبعت قوات تشيل علم البلد الاولى و ترفع علمها هى (خناقة اساتك و لبان عال اخر) .. البلدين فى الوقت الحالى بيعملوا مباحثات عشان يشوفوا حل و غالبا هيقسموا “الصخرة” نصين!!
بلدين مساحتهم خرافية و مش محاطين بأى مخاطر و لا فيه عدو مباشر ليهم على الحدود داخلين فى صراع بسبب عدم التفريط فى حتة زلطة تافهة مرمية وسط الجليد مساحتها 1.3 كم مربع لأن كل طرف مؤمن انها جزء من ارضه..
