رمضان فى الغربه

رمضان ف الغربه
رمضان ف الغربة إنك تنام شوية بعد العصر عشان ترتاح من الشغل قبل ما تقوم تحضر الفطار ، تصحى تلاقى نفسك نص الليل عشان مفيش حد يصحيك ….
رمضان ف الغربة إنك تشتري عصير و انت مروح ، و تصب كوباية ساقعة قبل المدفع بثواني ، و لما المغرب يأذن تكتشف ان العصير ده بيتخفف بميه ، و ما بيتشربش كده ….
رمضان ف الغربة إنك تحضر طبق واحد تفطر بيه بعد ما كان ما بيعجبكش العجب ، و تفضل تتفرج على الطبق لغاية ما المدفع يضرب تلاقيك بتاكل لقمتين بس و تشبع و تقول الحمد لله ….
رمضان فالغربة لما تبقى شامم طبيخ الجيران ، و مفيش حواليك حد تقول له نفسي في الصنف ده أو ده ….
رمضان ف الغربة لما تشتري الكنافة و القطايف و انت مروح ، و تفتكرهم تاني يوم الصبح لما تلاقيهم على الكرسي اللي جنبك في العربية ….
رمضان ف الغربة لما يادوب تبدأ تفطر ، و تلاقي باقي كراسي السفرة فاضية ، فتولع سيجارة و تقوم ….
الغربة أقسى ما تكون ….في رمضان